Кондак, глас 2-й

Канон святому благоверному

Князю Михаилу Тверскому

Память празднуем 22 ноября (5 декабря)

Тропарь, глас 8-й

Возвысив ум твой к Богу, и жития со Ангелы возжелел еси, тленную славу земную оставил еси, блаженне, и положил еси душу твою за люди твоя, восприял еси венец противу трудов твоих, Богомудре Михаиле, моли Христа Бога о чтущих любовию святую память твою.

Канон, глас 8-й

Песнь 1

Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще: поим Тебе, Единому Владыце.

Припев: Святый благоверный княже Михаиле, моли Бога о нас.

В помощь Тебе, Христе, призываю и дерзаю воспети страстотерпца Твоего память устнами недостойными: Владыко Христе, утверди помышление на хвалословие Твоего угодника.

Святый благоверный княже Михаиле, моли Бога о нас.

Российское удобрение, и правоверному народу нашему похвалу и крепость твои показав доброумный смысл, Богомудре Михаиле досточудне.

Слава: С дерзостию приял еси Христово учение в сердцы, еже положити душу твою за други твоя; якоже Христос за ны кровь Свою пролия.

И ныне: Заступнице скорбящих, спасения Надежда ненадеющихся, Богородице Всепетая, моли прилежно избавитися нам от бед.

Песнь 3

Ирмос: Утвердися сердце мое во Господе, вознесеся рог мой в Бозе моем, разширишася на враги моя уста мои, возвеселихся о спасении Твоем.

Святый благоверный княже Михаиле, моли Бога о нас.

Обителище бысть Святаго Духа твое святое сердце, имже не убоялся еси неправеднаго царя ярости, страстотерпче Михаиле.

Святый благоверный княже Михаиле, моли Бога о нас.

От святую боку Богомудрыя Ксении, блаженне, родился еси, с неюже тя блажим, страдальче прехвальне, спаси град твой и люди, поющия тя.

Слава: Заколен был еси от неправедных твоих убийц и вопиял еси Владыце Христу: приими дух мой, Владыко, на Тя бо упование мое возложих, Господи.

И ныне: Глаголы проповедник богогласных исполняются, сего роди Дева новаго Младенца, Адама старейша и сопрестольна Родителю.

Господи, помилуй (трижды).

Седален, глас 8-й

Мудростию Божиею уразумел еси мимоходящую жизнь и о княжении небрег, но на Небесное Царство притекл еси, повинуяся сыновцу, яко овча незлобиво, без правды ножем закалаем был еси, яко бо свирепии зверие беззлобива агнца без вины тя убиваху. Тем и со Ангелы веселяся, Михаиле святе, моли Христа Бога грехов оставление даровати чтущим любовию святую память твою.

Слава, и ныне: Безневестная Чистая Богородице Дево, Едина верных предстательнице и Покрове, бед, и скорбей, и лютых обстояний вся избави на Тя надежду, Отроковице, имущия и души наша спаси Божественными мольбами Твоими.

Песнь 4

Ирмос: Пророк Аввакум умныма очима провиде, Господи, Пришествие Твое, тем и вопияше: от юга приидет Бог. Слава силе Твоей, слава снизхождению Твоему.

Святый благоверный княже Михаиле, моли Бога о нас.

Приидем, братие, к честней раце воина Христова и мученика Михаила и облобызаем сердечными устнами, приемлюще неоскудныя дары от трудоположника Христа и Спаса душ наших.

Святый благоверный княже Михаиле, моли Бога о нас.

Божиим Промыслом и Святаго Духа детелию твое святое тело от губительныя страны принесено бысть, источающее нам реки исцелений струями кровей твоих, Михаиле.

Слава: Последовал еси Христу и муце Его уподобился еси, преблаженне Богоносе Михаиле, певцы твоя сохраняй и град наш заступи от нахождения поганых и от всех бед богоприятными твоими молитвами.

И ныне: Просвети, Чистая, души моея очи, Свет родившая, да не постигнет мене греховная тьма тяжкая и глубина отчаяния покрыет мя, но Сама мя спаси и направи к тишине Божественнаго хотения.

Песнь 5

Ирмос: Господи Боже наш, мир даждь нам, Господи Боже наш, стяжи ны, Господи, разве Тебе, иного не вемы, имя Твое именуем.

Святый благоверный княже Михаиле, моли Бога о нас.

Господи Боже мой, Михаил вопияше, Ты убо, Господи, нас ради смерти вкусил еси и спасл еси род человеческий Твоею кровию, Христе Боже.

Святый благоверный княже Михаиле, моли Бога о нас.

Господи Боже мой, сподоби мя прияти Небеснаго селения и славы неизреченныя и в тленных место нетленная подаждь, Владыко, вопиял еси, Боговидче.

Слава: Тезоимените вышняго воеводы, Михаиле, огнезрачнаго, с нимже умоли Христа подати мир народу нашему и утишити вражия стремления.

И ныне: Укрепи, Владычице, славящих Тя на противныя враги, яко Давида на Голиафа, да Тебе, веселящеся, воспеваем: радуйся, Покрове святый и Заступнице рода нашего.

Песнь 6

Ирмос: Якоже пророка избавил еси из глубины преисподния, Христе Боже, и мене от грехов моих избави, яко Человеколюбец, и управи живот мой, молюся.

Святый благоверный княже Михаиле, моли Бога о нас.

Светом благодати озаряемь, страстотерпче мудре, невозвратно шествовал еси путем, вводящим к Вышнему Иерусалиму: Святый бо Дух настави тя, обитаяй в сердце твоем, Михаиле.

Святый благоверный княже Михаиле, моли Бога о нас.

Тленная будущими изменил еси, яко меч обоюдуостр, вооружився страхом Христовым, горькую смерть в ничтоже вменил еси, славы вышния желая.

Слава: Ум твой к Богу вперив, надеждею и верою укрепився, яко воин непобедный, заколения неправеднаго не убоялся еси, мудре, Боговидче Михаиле.

И ныне: Тебе припадающе, Госпоже, и верою покланяющеся, молим Тя: радуйся, Богоблаженная Дево, покрове и ограждение наше, Помощнице в бедах сущим, спаси ны, не имущия помощи, на Тя бо надеемся.

Господи, помилуй (трижды). Слава, и ныне:

Кондак, глас 2-й

Вышних ища и земную славу презрев, Церковь Божию обагрил еси твоею кровию, за нюже и пострадал еси, святе Михаиле, заколение неправедное прием, веселяся. Темже со Ангелы предстоя Христу Богу, моли непрестанно за вся ны.

Икос

Славу возненавидел еси тленную и мимотекущую, и добродетели явился еси сосуд, славне, от юности и, закон Божий от души возлюбив и зрение к жизни грядущей, о чести земней и сласти небрег, нетленное Царство восприял еси; Христове заповеди последуя, положил еси душу твою за ны и Христове страсти уподобился еси, заколен в ребра, и кровию твоею избавил еси ны поганых нашествия и горькия смерти. Сего ради вопием ти: страстотерпче Михаиле, со Ангелы предстоя, молися за вся ны.

Песнь 7

Ирмос: Халдейская пещь, огнем распаляемая, орошашеся Духом, Божиим предстоянием, отроцы пояху: благословен еси, Боже отец наших.

Святый благоверный княже Михаиле, моли Бога о нас.

Величие наше и похвала ты еси, Михаиле Богомудре, тобою бо от поганския работы свободихомся. И ныне моли за род твой и люди, вопиющия: благословен Бог отец наших.

Святый благоверный княже Михаиле, моли Бога о нас.

Ты уподобился еси Моисею Боговидцу, сокрушенным сердцем моляся о стаде твоем избавити град твой и люди от вражия работы, вопиющия: благословен Бог отец наших.

Слава: Всехвальный глас и мольбу тебе возсылаем, к тебе приходяще, блаженне Михаиле: проси мира народу нашему и душам нашим оставления грехов, поющим: благословен Бог отец наших.

И ныне: Неисписанная многими пророки, не сведома же бысть, Дево, небесными служащими Богу Ангелы, ныне же Тя вси ведуще, Богородицу, Твоей требуем помощи и заступления, Благословенная.

Песнь 8

Ирмос: Покрываяй водами превыспренняя Своя, полагаяй морю предел песок и содержай вся, Тя поет солнце, Тя славит луна, Тебе приносит песнь вся тварь, яко Содетелю всех во веки.

Святый благоверный княже Михаиле, моли Бога о нас.

В нарочитый день святаго преставления радостно празднуем, песнь молебную Христу возсылающе, нетленным венцем венчавшу тя, прехвальне Михаиле: проси нам оставления грехов, славящим тя верно.

Святый благоверный княже Михаиле, моли Бога о нас.

Похвальныя цветы, яко царский венец, Богомудрей твоей главе в память приносим, юже Христос нетлением венча, преблаженне Михаиле: молися о стаде твоем, избавитися граду твоему от всякия беды.

Слава: Ливан ли гору наречем тя, Богомудрая Ксение, или Фисон реку, добрейши сапфира и камения честнаго, блаженнаго Михаила рождшую, имже просветися Российская страна, иже и молится за нас ко Господу.

И ныне: Гордыню и шатания низложи, и советы неправедныя князей разори, и зачинающия рать погуби, о Мати Божия, Пречистая Дево! Верных людей рог возвыси, да Твой, Пречистая, праздник славим, Богородице Дево, во веки вся.

Песнь 9

Ирмос: Чужде матерем девство, и странно девам деторождение на Тебе, Богородице, обоя устроишася. Тем Тя вся племена земная, непрестанно величаем.

Святый благоверный княже Михаиле, моли Бога о нас.

Приими похвалу от раб недостойных и молитву о нас сотвори к Богу, честно творящих твою память, да от бед и печалей и грех лютых свободимся, тя величающе.

Святый благоверный княже Михаиле, моли Бога о нас.

Яко голубица целомудрая, на финикс добродетели возшел еси, крила имущи священна и позлащенна, имиже возлетев, в райстей пищи водворяешися, преблаженне.

Слава: Предстоя у Престола всех Владыки, Боговидче Михаиле, о творящих честное твое празднество, граду нашему избавитися от напастей и бед, здравие и победу всем православным христианом на противныя враги испроси молитвами твоими.

И ныне: Высокий Царю, со Отцем седяй и от Серафим поемый, призри на мольбу Матерню, юже Ти за ны днесь приносит. Очисти грехи наша, и спаси град, и люди умножи, и даждь нам здравие телеси и на поганыя победу молитвами рождшия Тя.

Поиск по сайту: