Паки и паки, миром Господу помолимся

Господи, помилуй.

Заступи, спаси, помилуй и сохрани нас, Боже, Твоею благодатию.

Господи, помилуй.

Пресвятую, пречистую, преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Тебе, Господи.

Ты бо еси Царь мира, и Спас душ наших, и Тебе славу возсылаем, Отцу, и Сыну, и Святому Духу, ныне и присно, и во веки веков.

Аминь.

Диакон: Вонмем, премудрость, вонмем!

Чтец: Прокимен глас 4: Буди светлость Господа Бога нашего на нас / и дела рук наших исправи.

И призри на рабы Твоя и на дела Твоя.

Филипписием послания святаго апостола Павла чтение

Братие, возлюбленнии мои, якоже всегда послушасте мене, не якоже в пришествии моем точию, но ныне много паче во отшествии моем, со страхом и трепетом свое спасение содевайте: Бог бо есть действуяй в вас и еже хотети и еже деяти о благоволении. Вся творите без роптания и размышления, да будете неповинни и цели, чада Божия непорочна посреде рода строптива и развращена, в нихже являетеся якоже светила в мире, слово животно придержаще, в похвалу мне в день Христов

Диакон: И о сподобитися нам слышанию святаго Евангелия Господа Бога молим.

Господи, помилуй (трижды).

Премудрость, прости! Услышим святаго Евангелия.

Священник: Мир всем.

Хор: И духови твоему.

Священник: От святаго Евангелия чтение.

Хор: Слава Тебе, Господи, слава Тебе!

Диакон: Вонмем. (Священник читает евангелие)

Хор: Слава Тебе, Господи, слава Тебе!

Помилуй нас, Боже, по велицей милости Твоей, молим Ти ся, услыши и помилуй.

Господи, помилуй, (трижды)

Еще молимся о Великом Господине и отце нашем Святейшем Патриархе Кирилле, и о всей во Христе братии нашей.

Господи, помилуй, (трижды)

Призри, Человеколюбче, милостивым Твоим оком на вся ны, зде предстоящия и молящияся рабы Твоя, ко Твоему благоутробию верою припадающия, и услышав моления наша, благое намерение и дело рук наших благослови и благополучно и спешно кроме всякаго препятия во славу Твою совершити, яко всесильному Царю, молим Ти ся, услыши и помилуй.

Господи, помилуй, (трижды)

Ангела Твоего Хранителя пристави делу нашему, благоуветливе Господи, и еже воспятити вся препятия видимых и невидимых врагов, поспешство же во всем ко благополучному совершению делающим сотворити, молим Ти ся, Преблагий Спасе, услыши и помилуй.

Господи, помилуй, (трижды)

Во славу Твою вся творити повелевая Господи, всем нам, зде предстоящим и молящимся (имярек), ко Твоей славе дело свое творящим, благословением Твоим поспешство благополучное с довольством к совершению подаждь, здравие нам со благоденствием даруя, молим Ти ся, Вседаровитый Творче, услыши и помилуй.

Господи, помилуй, (трижды)

Поиск по сайту: