Лист от пана некоторого з рокошу выписаный o новинах рокошовых

Новины в[ашей] м[илости] ознаймую, которые ми в тую пришлую среду праве вседаючому, на рокош c Подляша мене дошли. Препис з листу слов власных до мене писаного в[ашей] м[илости] выписую. Нещасливые новины моему милостивому пану ознаймую, же наши битву з рокошаны програли, што кролевской милости пришло людей тридцать тысечей чужоземского на помоч. Который надею великую маючи, a до того рады злое услухавши, легце собе важечи панов рокошан, которых не было болш над пять тисечей, хотев их смерти, але они плац отрымали. Хотя з обу сторон немало пало, але еднак стороны нашей чужеземского люду немцов немало пало. То уже битва была по выезде моем c Подвислицы, зачым тут наши мазурове и подляшане и инших воеводств \л.158об.\ бегут заразем за ознайменьем оттамътоль от панов депутатов, як на кгвалт, яко перепис универсалу тые новины от понеделка 8 дня октобра на выезде моим тые новины принесены.

Универсал рокошовый року 1606, месеца сен[тебря] 25 дня. Мы, рады и станы рыцерские, которыесмы се тут докола зьезду рокошового, для актикованя справ Речы Посполитей, на тым рокошу намовеных, такъже и давано знать o респонсе его королевское милости на поселство от нас да не депутоване, и тут на том местцу зоставлени суть всим их милостем коронным и в князстве Литовским обывателем ознаймуемы, иж дня вчорайшого од его королевское милости их милость панове послове нашы воротилисе и з отповедю, и з респонсем, нам всим не тылко барзо жалосным нам, не тылко очекиваню нашему, але першим респонсем и деклярациям его к[о]р[олевской] м[и]л[ости] противным, бо место того в чом есмо од его к[о]р[олевской] милости отух отрымати мелисмы, тераз згола ничого, ани наветь дирректум респонсум на жадеи артикул не однеслисмы и o вшем усим правам пригана, яко бы не слушне, неуважне, навети не побожне в нас подане быть мели ест учинена. Затым турбоване Речы Посполитой ест нам приписано и пены \л.159.\ таковым служащие на нас c прегрозками суть ^Н захрона зась и устификованьем тым, которым от рады злые, ад абсолютум доминум, служаще коле нашым вина была дана. A тот ест ефентия респонсум его к[о]р[олевской] м[и]л [ости] против зданю пред ним сенаторов до него, которая она рада ад абсолютум доминум служонца, которые тераз, яко иншые уразы Речи Посполитой тылко некгативе там зноша, тож праве скутечне выража, кгдыж при тым наступила резолюция талия аб ту на нас з войском натрет. A тот рокош кровию нашею обляти, их конатус наше про реипублице боно пред се взяте розервать. Также бы нам до далших консултаций и попарти прав волностей наших прийти не могло до которых консултаций, иж в респонсе нашим на поселство коло тамтого Вижлицкого даным, одозвали мы се ту ани кгвалтовным на нас наступом попредити и розервати хотят, если им до конца цнота зацного рыцерства в том якого не учинит встроту, которые яко мают ведомость почувают се в том, што отчизне, што волностям шляхецким на своим повинни так се декляровали ^О, же рачей нам Реч Посполита до помочи хочет, ани ж бы на нас брони свои поднести мели ^П, иж теды юж праве от решт иде. \л.159об.\ A иншого ратунку на тот час отчизне нашой не видимо в[ашей] м[илости] наших милостивых панов и ласкавых братии просимо, абысте в[аша] м[илость], яко на кгвалт c тою готовостю овде посилать се и з оною Речи Посполитой опатроватся в[аша] м[илость] рачили бежит нас посилят тые, што суть поблизу зараз. A што одне глаголешые на день 19 месяца октобра, тут под Сондомир, жебысте прибывать в[ашей] м[илости] рачили, где и респонсови его к[о]р[олевской] м[и]л[ости] и той то, которой еще и некоторые прагнут o пратктыках ^Р построныых информации припатривщисе до завартя, зась сполна до пана бога згода рокошу того приступити нам прииде, a мы тым часом на той стражи будучы кгвалтови прав и волностей нашых одпор давать и оным здоровем своим заставят се незанехаемо, где бысте в[аша] м[илость] нас рихлым прибытем своим, также и ратунком пенежным до затрыманя и причиненя людей служебным посилить не занехали з рук в[ашей] м[илости] ^С пан бог крви нашое апостеретас прав и волносте утрачоных певне бы патрали,

^Н буква у неясно, y Доенар-Запольского и A. Малъцева передано: сь ть ^О перед и вытерта буква ^П л переделано из другой буквы ^Р первое т над строкой ^С после слова м[илость] вытертая буква б

але и сами пострадавши милых свобод юкгум серенитатис про патрия, a на кгарлах своих носячи дни з \186\ неулютованым жалем провадити и кончити бысте мусели, a еднак мы статечне, в[аша] м[илость], против Речи Посполитое и против нам братии своее, взаем \л.160.\ ною милостю жадного не маючи вонтпеня певнисмы, же в[аша] м[илость] в той ледво не остатней юж то ни Речи Посполитей и нас, братии своей, отбежати не будете рачили, могучи звлаща в добрым уваженю o вси поступки зьездов прешлых c того рокошу, же ничого иншого едно што до варунку и беспеченства Речы Посполитой и целости прав и свобод наших належит, то собе ничого важачы. A з другой стороны, абы кандоре, яко щирий их противко нам поступок лацно ^Т уважити, бох гдысмы за суспициею, которою нас неслушне в огиду подавали o замыслу отмЂны пана з себе з речью самою знесли осведчат и он цЂ тотже направы самой Речи Посполитой такой еднак, которая бы не проформа без скутку, але ретелною была, потребуем. Они своими артикулы нас зарутили роботе нашое, ми на прерыпендии нас хотячи отразити, зараз з инъшей меры на нас натиратти, вси поступки наши потопят, абы так зачатой окултате реймен вцале зоставал. Не занехало затым в[ашей] м[илости,] паметаючи на тот звязок конфедорации прикладом продков наших, межи нами учиненую наз, \л.160об.\ которой имена свои зь обовязком вЂры, почтивости и сумненя c подписом рук дате, се же ни в чом не отступуючи скутком и речью самою оное выпелнит и досит оному учинити будете в[аша] м[илость] хотели дать в Сендомеру 20 дня месяца вресня, року 1606. Миколай Жебрыдовский, воевода и енерал краковский; Ян Швейковский рукою своею; Самуел Ташицкий, депутат воеводства Краковского; Войтех Сосницкий, депутат воеводства Виленского; Федор Субчавский Проскура, депутат киевский; Петр Стабровский, кашталян пернавский рукою; Станъморский з Морска рукою своею; Иоан Сулигостовский з Сулигустова, депутат воеводства Судомирского; Станислав Стадницкий, староста жикгволский, депутат воеводства Руского; Януш Радивил, маршалок зьезду рокошового; Иоан Гаръбурт c Тулщына, хоружый лвовский з Руского воеводства; Миколай Щенец Сондомирский; Войтех Страж Белахова; Одровеж, депутат повету Опочинского; Героним Прылецкий, депутат c повету Освотиского Заторского; Ян Лемахий з воеводства Любелского; Героним Милиша, депутат воеводства Белского; \л.161.\ Павел Рашовский з Рашова, депутат повету Высогорского; Ян Швейковский до книг подал рукою своею.

Поиск по сайту: