 |
АвтоАвтоматизацияАрхитектураАстрономияАудитБиологияБухгалтерияВоенное делоГенетикаГеографияГеологияГосударствоДомДругоеЖурналистика и СМИИзобретательствоИностранные языкиИнформатикаИскусствоИсторияКомпьютерыКулинарияКультураЛексикологияЛитератураЛогикаМаркетингМатематикаМашиностроениеМедицинаМенеджментМеталлы и СваркаМеханикаМузыкаНаселениеОбразованиеОхрана безопасности жизниОхрана ТрудаПедагогикаПолитикаПравоПриборостроениеПрограммированиеПроизводствоПромышленностьПсихологияРадиоРегилияСвязьСоциологияСпортСтандартизацияСтроительствоТехнологииТорговляТуризмФизикаФизиологияФилософияФинансыХимияХозяйствоЦеннообразованиеЧерчениеЭкологияЭконометрикаЭкономикаЭлектроникаЮриспунденкция
Диакон полагает ножницы на Евангелии
Игумен же глаголет: Мир всем.
Диакон: Главы ваша Господеви приклоните.
Лик: Тебе, Господи.
Игумен: Господи Боже наш, упование и прибежище всем уповающим на Тя, различныя пути спасения нам показавый вочеловечением Христа Твоего: приими раба Твоего ________, оставльшаго мирския похоти и себе принесшаго Тебе Владыце жертву живу благоугодну, отыми от него всякую плотскую похоть, и безсловесная приимания, яко да отложением нечувственных власов соотложит и безсловесныя мысли же и деяния, и сподобится прияти иго Твое благое, и легкое ти бремя, и взяти крест, и последовати Тебе Владыце. Соблюди его в Твоей святыни, и даруй ему предложение благое в соблюдении святых Твоих заповедей, сочетавая его во время благопотребно лику избранных Твоих, благодатию и человеколюбием Единороднаго Сына Твоего, с Нимже благословен еси, со Пресвятым, и Благим, и Животворящим Ти Духом, ныне и присно, и во веки веков.
Лик: Аминь.
Игумен простер десницу свою к святому Евангелию, глаголет:
Се Христос невидимо зде предстоит: виждь, яко никтоже тя принуждает прийти к сему образу, виждь яко ты от своего си произволения хощеши обручение великаго ангельскаго образа.
Отвещает: Ей, честный отче, от своего ми произволения.
Игумен, показуя десницею на ножницы, глаголет трижды:
Возми ножницы и подаждь ми я.
Трижды новоначальный взем ножницы подает я игумену, лобызая десницу его.
Игумен же взем на святом Евангелии полагает я, и глаголет к нему:
Се от руки Христовы приемлеши я: виждь, Кому обещаваешися, и к кому приступавши, и кого отрицаешися.
Взем же игумен ножницы от святаго Евангелия, паки конечнее глаголет:
Благословен Бог хотяй всем человеком спастися, и в познание истины прийти: Сый благословен во веки веков.
Лик: Аминь.
Абие же игумен постригает верх главы его крестообразно, глаголя, и новое имя ему нарицая:
Брат наш, ________, постригает власы главы своея, в знамение отрицания мира, и всех яже в мире, и во отрезание своея воли, и всех плотских похотей, во имя Отца, и Сына, и Святаго Духа: рцем вси о нем, Господи, помилуй.
Лик трижды: Господи, помилуй.
Игумен же десницею коснувся власяницы, еюже одеян есть новоначальный, и держа за ню, глаголет:
Брат наш, ________,облачится в хитон вольныя нищеты и нестяжания, и всяких бед, и теснот претерnпения, во имя Отца, и Сына, и Святаго Духа: рцем вси по нем, Господи, помилуй.
И знаменает его крестообразно, он же лобызает власяницу и десницу настоятелеву.
Лик трижды: Господи, помилуй.
Игумен же взем параман и крест,
глаголет:
Б рат наш, ________, приемлет параман во обручение великаго ангельскаго образа, в одежду нетления и чистоты, и во всегдашнее воспоминание благаго ига Христова взятия на себе, и легкаго бремене его ношения, и во обуздание, и связание всех похотей и желаний плоти своея; приемлет же и знамение Креста Господня на своя перси, во всегдашнее воспоминание злострадания, и уничижения, оплевания, поношения, ран, заушения, распятия, и смерти Господа Бога и Спаса нашего Иисуса Христа, яже волею нас ради претерпе, и во еже по елику мощно сия подражати тщатися, во имя Отца, и Сына, и Святаго Духа: рцем вси о нем, Господи, помилуй.
Лик трижды: Господи, помилуй.
Посем, взем подрясник и рясу, глаголет:
Б рат наш, ________,облачится во одежду веселия и радости духовныя, во отложение и попрание всех печалей, и смущение от бесов, от плоти, и от мира находящих: во всегдашнее же его о Христе веселие и радование, во имя Отца, и Сына, и Святаго Духа: рцем вси о нем, Господи, помилуй.
Лик трижды: Господи, помилуй.
Взем же усмяный пояс, и держа и
шуйцею, глаголет:
Б рат наш, _______, препоясует бедре свои силою истины, во умерщвление тела, и обновление духа, в бодрость же и опасство, во снабдение заповедей Христовых, во имя Отца, и Сына, и Святаго Духа: рцем вси о нем, Господи, помилуй.
Лик трижды: Господи, помилуй.
Посем взем мантию, и держа ю шуйцею, глаголет:
Б рат наш, _______, облачится в ризу спасения, и в броню правды, во еже отшаяватися от всякия неправды, и опасно своего разума составление, и своея воли мудрование обрезати, смерти же память всегда во уме своем имети, распята же себе быти мирови вменяти, и мертва на всякое дело зло имети, жива же присно на всякую добродетель Христови неленостно представляти, во имя Отца, и Сына, и Святаго Духа: рцем вси о нем, Господи, помилуй.
Лик трижды: Господи, помилуй.
Таже взем клобук, и держа его шуйцею, глаголет:
Б рат наш, _______, приемлет шлем спасения, и непостыднаго упования, во еже мощи ему стати против всем кознем диавольским.
Покрывает главу свою покрывалом смирения и всегдашняго послушания, в знамение духовнаго любомудрия, и во еже отвратити очи свои еже не видети суеты, во имя Отца, и Сына, и Святаго Духа: рцем вси о нем, Господи, помилуй.
Лик трижды: Господи, помилуй.
Взем же сандалия, и шуйцею держа я, глаголет:
Б рат наш, _______, обувается в сандалия, благовествования мира, во еже скору быти ему, и тщаливу на всякое послушание, и на всяко дело благое: косну же и нескору ко исполнению своея воли, и ко всякому делу неподобному, во имя Отца, и Сына, и Святаго Духа: рцем вси о нем, Господи, помилуй.
Лик трижды: Господи, помилуй.
По сих же приим четки, и шуйцею держа и,
глаголет:
П риими, брате, _______, меч духовный, иже есть глагол Божий, во всегдашней молитве Иисусовой, всегда бо имя Господа Иисуса во уме, в сердце, в мысли, и во устех своих имети должен еси, глаголя присно: Господи, Иисусе Христе, Сыне Божий, помилуй мя грешнаго: рцем вси о нем, Господи, помилуй.
Лик трижды: Господи, помилуй.
Настоятель же взем ручный крест,
держа и десницею, глаголет:
П риими, брате, (имя рек), щит веры, крест Христов, в немже возможеши вся стрелы лукаваго разженныя угасити: и памятствуй всегда, яко рече Господь: иже хощет по мне ити, да отвержется себе, и возмет крест свой, и последует Ми: рцем вси о нем, Господи, помилуй.
И знаменав новоначалънаго крестом крестообразно, подает ему, он же приемля десною рукою лобызает крест, и десницу настоятелеву.
Лик трижды: Господи, помилуй.
Наконец же, взем свещу горящую,
игумен подает глаголя:
П риими, брате, свещу сию, и виждь, яко отселе должен еси чистым и добродетельным житием, и благими нравы, свет быти миру. Рече бо Господь: тако да просветится свет ваш пред человеки, яко да видят ваша добрая дела, и прославят Отца вашего, Иже на небесех: рцем вси о нем, Господи, помилуй.
Новоначалъный же взем свещу, лобызает десницу его.
Лик трижды: Господи, помилуй.
По всех же сих, десницею благословляя новоначалънаго игумен, глаголет:
Б рат наш, _______, восприял есть обручение великаго ангельскаго образа, и оболкся есть во вся оружия Божия, во еже мощи ему крепко победити всю силу и брани начал, и властей, и миродержителей тмы века сего, духов злобы поднебесных: во имя Отца, и Сына, и Святаго Духа: рцем вси о нем, Господи, помилуй.
Лик трижды: Господи, помилуй.
Диакон: Господу помолимся.
Лик: Господи, помилуй.
Настоятель же чтет молитву сию:
Г осподи Боже наш, введи раба Твоего сего, _______, в духовный Твой двор, и сопричти его словесному Ти стаду: очисти его мудрование от плотских похотей, и тщетныя прелести жития сего, и даждь ему незабытно поминати уготованная благая любящим Тя, и распеншым себе житию сему, Царствия ради Твоего. Ты бо еси пастырь и посетитель душ наших, и Тебе славу возсылаем Отцу, и Сыну, и Святому Духу, ныне и присно, и во веки веков. Лик: Аминь.
Диакон: Миром Господу помолимся.
Лик: Господи, помилуй.
О свышнем мире, и спасении душ наших, Господу помолимся.
О мире всего мира, благостоянии святых Божиих церквей, и соединении всех, Господу помолимся.
О брате нашем ________, и еже от Бога покрове и помощи его, Господу помолимся.
О еже без порока неосужденно и непреткновенно, исправити его намерение монашескаго образа, Господу помолимся.
О еже пребыти ему во всяком благочестии, и благоговении и чистоте, Господу помолимся.
О еже отложити ему ветхаго человека и облещися в новаго по Бозе созданнаго, Господу помолимся.
О оставлении и прощении грехов его, Господу помолимся.
О еже избавитися ему и нам от всякия скорби, гнева и нужды, Господу помолимся.
Заступи, спаси, помилуй и сохрани нас, Боже, Твоею благодатию.
Пресвятую, Пречистую, Преблагословенную Славную Владычицу нашу Богородицу, и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Лик: Тебе, Господи.
Игумен: Яко свят еси, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков.
Лик: Аминь.
Диакон: Вонмем.
Игумен: Мир всем.
Чтец: И духови Твоему.
Диакон: Премудрость, вонмем.
Чтец: Прокимен, глас 3:
Господь просвещение мое / и спаситель мой, кого убоюся.
Стих: Господь Защитите ль живота моего, от кого
устрашуся?
Диакон: Премудрость.
Чтец: К Ефесеом послания святаго Апостола Павла чтение.
Диакон: Вонмем.
Чтец же чтет апостол к Ефесеом, глава 6, зачало 233:
Б ратие, возмогайте во Господе, и в державе крепости Его: облецытеся во вся оружия Божия, яко возмощи вам стати противу кознем диавольским: яко несть наша брань к крови и плоти, но к началом, и ко властем, и к миродержителем тмы века сего, к духовом злобы поднебесным. Сего ради приимите вся оружия Божия, да возможете противитися в день лют, и вся содеявше стати. Станите убо препоясани чресла ваша истиною, и оболкшеся в броня правды, и обувше нозе во уготование благовествования мира: над всеми же восприимше щит веры, в немже возможете вся стрелы лукаваго разжженныя угасити: и шлем спасения восприимите, и меч духовный, иже есть глагол Божий.
Игумен глаголет: Мир ти.
Чтец: И духови твоему. Аллилуиа (трижды).
Стих: Се нищий воззва, и Господь услыша и:
/и от всех скорбей его спасе и.
Диакон: Премудрость, прости услышим
святаго Евангелиа.
Игумен: Мир всем.
Лик: И духови твоему.
Игумен: От Матфеа святаго Евангелиа чтение.
Диакон: Вонмем.
Игумен же чтет Евангелие от Матфея, глава 10, зач. 39 и 43.
Р ече Господь: иже любит отца или матерь паче Мене, несть Мене достоин, и иже любит сына или дщерь паче мене, несть Мене достоин. И иже не приимет креста своего, и в след Мене грядет, несть Мене достоин. Приидите ко Мне вси труждающиися и обремененнии, и Аз упокою вы. Возмите иго Мое на себе, и научитеся от Мене, яко кроток есмь и смирен сердцем: и обрящете покой душам вашим. Иго бо Мое благо, и бремя Мое легко есть.
Лик: Слава Тебе, Господи, слава Тебе.
Игумен взем за руку новоначального, отдает его старцу, глаголя:
С е вручаю тебе пред Богом сего новоначальнаго, егоже в страсе Божий и во всех добродетелех жити поучай: блюдый опасно, да не нерадения ради твоего погибнет душа его: имаши бо ответ дати Богу о нем в день судный.
К новоначалъному же глаголет:
Т ы же, якоже Христови во всем повинися старцу, и во всем терпелив буди, смирен же, послушлив, кроток, и молчалив, и обрящеши благодать пред Богом,и спасешися.
Диакон: Помилуй нас, Боже, по велицей милости Твоей, молимтися, услыши и помилуй.
Еще молимся о оставлении, прощении грехов рабу Божию ________.
Игумен: Яко Милостив и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Лик: Аминь.
Диакон: Премудрость.
Лик: Честнейшую херувим:
Игумен: Слава Тебе, Христе Боже, упование наше, слава Тебе.
Лик: Слава, и ныне: Господи, помилуй (трижды). Благослови.
Игумен: Христос Истинный Бог наш, молитвами Пречистая Своея Матере, святых славых и всехвальных апостол, преподобных и богоносных отец наших, Антония и Феодосия Печерских, Иова Почаевскаго и прочиих в постничестве просиявших, и всех святых своих, помилует и спасет нас, яко Благ и Человеколюбец.
Лик: Господи, помилуй (трижды).
Поиск по сайту: