Отверзаются царские врата

Игумен: Благословен Бог наш всегда, ныне и присно, и во веки веков.

Чтец: Аминь. Святый Боже, Святый Крепкий, Святый Безсмертный, помилуй нас (трижды).

Слава Отцу и Сыну и Святому Духу, И ныне и присно и во веки веков, аминь.

Пресвятая Троице, помилуй нас, Господи, очисти грехи наша, Владыко, прости беззакония наша, Святый, посети и исцели немощи наша, имене Твоего ради.

Господи, помилуй (трижды).

Слава Отцу и Сыну и Святому Духу, и ныне и присно и во веки веков, аминь.

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Игумен: Яко Твое есть царство, и сила, и слава, Отца и Сына и Святаго Духа, ныне и присно, и во веки веков.

Лик: Аминь.

О бъятия Отча отверсти ми потщися, блудно мое иждих житие, на богатство неиждиваемое взираяй щедрот Твоих, Спасе, ныне обнищавшее мое да не презриши сердце. Тебе бо, Господи, умилением зову: согреших на Небо и пред Тобою.

Слава Отцу и Сыну и Святому Духу:

О бъятия Отча отверсти ми потщися, блудно мое иждих житие, на богатство неиждиваемое взираяй щедрот Твоих, Спасе, ныне обнищавшее мое да не презриши сердце. Тебе бо, Господи, умилением зову: согреших на Небо и пред Тобою.

И ныне и присно и во веки веков, аминь.

О бъятия Отча отверсти ми потщися, блудно мое иждих житие, на богатство неиждиваемое взираяй щедрот Твоих, Спасе, ныне обнищавшее мое да не презриши сердце. Тебе бо, Господи, умилением зову: согреших на Небо и пред Тобою.

По окончании пения тропаря на «и ныне», игумен велегласно глаголет к лежащему:

Бог милосердый, яко Отец чадолюбивый зря твое смирение, и истинное покаяние, чадо, яко блуднаго сына приемлет тя кающагося, и к Нему от сердца припадающаго.

И абие преклонься воздвизает ниц лежащаго, взем под десную руку.

Игумен же вопрошает его, глаголя:

Что пришел еси, брате, припадая к святому жертвеннику, и к святей дружине сей?

Он же кланялся отвещавает:

Желаяй жития постнического, честный отче.

Вопрос: Хощеши ли сподобитися ангельскому образу, и вчинен быти лику инокующих?

Ответ: Ей, Богу содействующу, честный отче.

Игумен же глаголет:

В оистину добро дело и блаженно избрал еси, но аще и совершиши е: добрая бо дела трудом стяжаваются, и болезнию исправляются. Отверзи твоего сердца ушеса, о брате, и услыши глас Господень глаголяй: Приидите ко Мне вси труждающиися и обремененнии грехми, и Аз упокою Вы. Возмите иго Мое на себе, и научитеся от Мене, яко кроток есмь и смирен сердцем, и обрящете покой душам вашим. Ныне убо противу коемуждо вопрошению, подобающий ответ со страхом и радостию отдаждь Богу. Известно же веждь, яко Сам Спаситель наш, со Препетою Своею Материю, и святыми ангелы, и всеми святыми Своими зде прииде, внушая исходящая от тебе словеса: да егда приидет судити живым и мертвым, воздаст ти, не по Емуже имаши обещатися, и исповедати, но по Ёмуже аще сохраниши, яже исповеси. Темже ныне, аще воистинну приступавши к Богу, со всяким вниманием отвещавай нам, противу ихже нами вопрошен быти имаши.

Вопрос: Вольным ли своим разумом, и вольною ли своею волею, приступаеши ко Господу?

Ответ: Ей, Богу содействующу, честный отче.

Вопрос: Не от некия ли нужды, или насилия?

Ответ: Ни, честный отче.

Вопрос: Отрицавши ли ся мира и сущих в мире по заповеди Господней?

Ответ: Ей, честный отче.

Вопрос: Пребудеши ли в монастыре сем, или в немже ти от святаго послушания повелено будет, и в постничестве, даже до последняго твоего издыхания?

Ответ: Ей, Богу содействующу, честный отче.

Вопрос: Сохраниши ли ся в девстве, и целомудрии, и благоговении даже до смерти?

Ответ: Ей, Богу содействующу, честный отче.

Вопрос: Сохраниши ли даже до смерти послушание к настоятелю, и ко всей о Христе братии?

Ответ: Ей, Богу содействующу, честный отче.

Вопрос: Пребудеши ли до смерти в нестяжании, и вольной Христа ради в общем житии сущей нищете, ничтоже себе самому стяжавая, или храня, разве яже на общую потребу, и се от послушания, а не от своего си произволения?

Ответ: Ей, честный отче, пребуду Богу поспешествующу.

Вопрос: Приемлеши ли вся иноческаго общежительнаго жития уставы, и правила от святых отец составленная, и от настоятеля тебе по-даемая?

Ответ: Ей, честный отче, приемлю, и с любовию лобызаю я.

Вопрос: Претерпиши ли всякую тесноту, и скорбь иноческаго жития, Царствия ради Небеснаго?

Ответ: Ей, Богу споспешествующу, честный отче.

Посем игумен глаголет к нему оглашение сие:

В иждь, чадо, какова обетования даеши Владыце Христу, ангели бо предстоят невидимо, написующе исповедание твое сие, о немже и истязай будеши во Второе Пришествие Господа нашего Иисуса Христа.

Сказую убо ти совершенное житие, в немже по подобию, Господне жительство является, засвидетельствуя яже подобает ти приимати и ихже подобает отбегати. Се бо предложил еси, чадо, еже приступити и работати Господеви. Аще убо хощеши инок быти, прежде всех очисти себе от всякия скверны плоти и духа, совершая святыню в страсе Божий. Стяжи смиренномудрие, имже наследник будеши вечных благ. Отложи житейскаго обычая шатание, послушание имей ко всем, безроптив буди в заповеданных ти, службах, в молитве терпелив, во бдениих неленостен, во искушениих не печалуй, в постех не разслабляйся. Веждь же, яко молитвою и постом подобает ти умолити Бога. В немощех не пренемогай, поразумевай же лукавыя помыслы, не имать бо престати враг, предлагая тебе память перваго жития мирскаго, и ненависть к добродетельному жительству. Подобает убо тебе наченшу путь ведущий в Царство Небесное не возвратитися вспять, не будеши бо управлен в Царство Небесное. Да не предпочтеши убо чего паче Бога: да не возлюбиши ниже отца, ниже матерь, ниже братию, ниже коего из своих, ниже сам себе возлюбиши паче Бога, ниже царствия мира, или упокоения коеголибо буди, или чести. Нищеты да не отвращаешися, но в ней до смерти да пребываеши, ни озлобления, ни уничижения человеческаго, ниже инаго чесого, еже непщевати будеши быти неудобно, и возбранен будеши тещи за Христом, но присно взирай на яже во упованиих по Бозе живших благая, и вся от века помышляй мученики и преподобныя, иже многими поты и труды, и безчисленными кровьми и смертьми сия стяжаша. Над вся же сия, всегда во уме своем имей спасительныя страсти и животворную смерть Господа нашего Иисуса Христа, яже волею спасения нашего ради претерпе, яко да и ты вся беды иноческаго жития, и тесноту сладце Его ради претерпйши. Трезвися убо во всем, злопостражди яко добрый воин Христов. Сам бо Господь и Бог наш, богат Сый в милости, нас ради обнища, яко да мы обогатимся Царствием Его. Подобает убо и нам подражателем Его быти, и Его ради вся претерпети, преспевающым в заповедех Его день и нощь. Сам бо Господь рече: аще кто хощет в след Мене идти, да отвержется себе, и возмет крест свой, и в след Мене да идет, еже есть готову присно быти даже до смерти, на всякое исполнение заповедей Его. Ибо алкати имаши и жаждати, досаду же подъяти и укоризну, поношение же и гонение, и инеми многими отяготитися скорбьми, имиже сущий по Бозе живот начертавается. Егда же сия вся постраждеши, радуйся, рече Господь, яко мзда твоя многа есть на небесех, Емуже слава во веки, аминь.

Вопрос: Сия вся тако ли исповедавши упованием силы Божия, и в сих обетех пребывати обещаешилися даже до кончины живота твоего, благодатию Христовою?

Ответ: Ей, Богу содействующу, честный отче.

По сих же абие игумен глаголет к нему сие:

В сещедрый убо Бог, и многомилостивый, пречистыя утробы Своея неизследимыя благости, отверзаяй всякому приходящему к Нему с желанием и любовию теплою, рекий: аще бы и жена забыла исчадие свое, Аз же не забуду тебе: и твое ведый желание, и к предложению твоему прилагая сущую от Него силу ко исполнению Своих заповедей, да восприимет, и обымет, и защитит, и да будет ти стена тверда от лица вражия, камень терпения, утешения вина, крепости податель, благодушия снискание, мужеству сподвижник, лягая и востая' с тобою, услаждая и веселя сердце, твое, утешением Святаго Своего Духа, сподобляя тя и части святых и преподобных отец наших Антония, Евфимия, Саввы, и Антония и Феодосия Печерских, Иова Почаевскаго, и всех прочих преподобных отец с ними во иночестве Христови благоугодивших, с ними же и ты Царство Небесное да наследиши, о Христе Иисусе Господе нашем, Емуже слава и держава, Царство и сила, со Отцем и Святым Духом, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Поиск по сайту: