О осочниках

Устава на волоки

Р.

Устава на волоки господаря короля его милости во всем Великом князьстве Литовском, лета Божого нароженья 1557, апреля 1 дня.

І

О боярах путных и о служках

Бояре путные стародавные, а не вкупные хочем мети абы были на двух волоках постановлены с которых бы за вси повинности пенязми, ошацовавши водле грунту, яко люди осадные платили. А на службу тяглую и в подводы ходити не повинни. А коли з росказанья нашого на дорогу поедут, того году ничого платити не мают. А без воли и росказанья нашого вряду нашому их на дорогу не посылати. А будучи на дорозе, служити им по старому: навязка им, яко и перед тым, водле статуту. Служок с таких же бояр ревизоры обирати, и не больш, только с потребу, при кождом замку и дворе нашом зоставити мают. Которых клужба будет ездити з листы нашими до дворов тому врядови прилеглых, и с пенязми платов наших до Вильни, до скарбу, и за кривдами подданых – колеею з росказанья врядового ездити. А за то им на один конь две волоки вольных от всих платов мети, и на потребу вряду ездити не повинни.

О бортях

Иж первей бортеве розность в роботах от инших подданых наших мели и тепер их зоставуем абы водле шацунку грунтов, за вси повинности, цыншы, овсы и сена пенязми з волок до скарбу нашого платили, яко и осадники. А коли им на войну ити кажем, мают мети тот рок вольный ото всих платов. А мосты им повинные заробляти. И теж, за росказаньем и листом нашим, мосты им и неповинные мостити мают, а за то им фолькгу в цыншах наших делати кажем, водле воли нашое.

О конюхах седельных и инших

Конюхи седельные альбо дворные мают мети по две волоки вольных на службу конюшскую, на которой коли будут, мает быти давано им на страву и на вси потребы грошей коп чотыри на рок. А которые на службе не будут, мают платити с кождое волоки по тому ж, яко и бортеве.

О стрельцах

Стрельцом нашим по две волоки вольные мает быти дано, а третюю на цыншу, хто похочет. А служба их з росказаньем нашим в ловы и на войну.

О слугах дворовых

Одверные и иншые слуги дворные, мешкаючи на послугах наших, мают мети по две волоки вольных от всих платов и повинностей. А которые на службах наших не будут, абы платили с кождое волоки пенязми водле грунту, ошацовавши вси повинности. А естли бы зстаревши ся на службах наших, дома мешкали, таковым обедве волоки вольных мети, ведже олиж за листом нашим господарским.

О осочниках

Ревизор з лесничим мает осочников обирати, а не болш, одно с потребу при пущах и ловах наших становити, и то нам господарю ознайомити. А на службу им по две волоки давати вольных от цыншу и всяких потяглей.

Поиск по сайту: