О листех на данину

Абы и тым, кому што з ласки нашое бывает дано, трудности при личбе не было. Про то, кому што от которого двора нашого дадим, державца або тивун оный лист наш, за которым поступити даное мает, в реистр свой вписати повинен, и кгды при личбе окажет, то мает быти принято. А ведже подскарбий о таковых данинах мает в канцелярыи нашой ведомости брати, и, естли не згодят ся копея того листу с метрикою канцлярыйскою, повинен будет врядник шкоду нам оправовати або оный лист, за которым поступил, оказати.

Платы, цыншы, серебщизны и вси иные доходы с подданых наших от уряду и их наместников нигде инде не мают быти браны, только в дворех наших. А где дворов наших нет, ино в местех або на селе на одном местцу в господе, не поезджаючи и не посылаючи на села а ни в домы войтов, под ласкою нашою, чого ревизорове с пильностью доведывати ся мают. Которые цыншы и всякие платы подданые во всих замках и волостях наших мают почати давати до вряду своего на день святого Михаила, и так будут отдавати, за впоминаньем войта своего, аж до святого Мартина, кождый при своем войте.

А хто не отдаст до менованого дня, войт, за росказаньем врядничем, мает такого ставити перед урядом. А вряд, доведавши ся, иж он могучи заплатити податок, за недбалостью не платит, мает до вязенья осадити поколь не заплатит. А децкованья не брати на нем, только один грош поколодного. А волов и коней за цынш и ни за што иное не грабити. А который чоловек не может, то есть за пожогою, за вымеретьем або за хворобою всего дому, за голодом, за побитьем граду и за убожством, такового, кгды войт поставит, уряд от войта и лавников, и суседовего ведомость вземши, мает отослати до его дому доведати ся достаточне. И (якщо) будет справедливо то, такового мает в реистр вписати и при личбе в скарбе оповедати за которою причиною не мог отдати.

А подскарбий наш при личбе мает то отложити на выведанье ревизора. Который ревизор того ж году, которого личбы починают ся, мает быти послан и выведанье чинити от войтов и подданых суседов того, хто не отдал. А доведавши ся так неотданых платов (яко и волок пустых и всих речей, што бы з личбы на квитех до выведанья описано, и теж ужатья гумна в том лете), мает свой лист дати на то, чого ся доведает около речей з личбы описаных. А тот лист его будет моцный, яко и скарбный квит в той речи. И на другой личбе, в скарбе, за оказаньем того листа ревизорского, мает быти принято все, што в нем описано.

А часу выбиранья доходов наших долгов своих нихто на подданых наших справовати не мает.

Поиск по сайту: