О ревизорах, мерниках и о помере волочной, и о селидбах подданых

Ревизоры мают быти присяглые, люди добрые, суменья побожного, оселые а не голоты, в помере волочной и в господарстве добре умелые, абы умели всего достаточне и справедливе выведати и указати пожиток наш врядови, в чом ся может причинити. Теж ревизор мает догледати и с пильностью доведывати ся, абы нихто з шляхты и подданых наших в пущах, на властных грунтех наших проробков не чинили и никак к себе не привлащали, и оповедати нам того недбалого врядника, в чыем бы ся то уряд деяло. Теж ревизоры мают догледати абы от мерников селитбы назначиваны были в третьем середнем поли. А где бы мерник того не вчинил, тогды сам ревизор мает назначити селитьбы, а вряд мает с пильностью примусити подданых селити ся на местцах назначоных, чого тот же ревизор мает догледати, и всих справ господарства врядового, естли слушне а радне справуют ся. А нерадного и такового, который бы ся не водле уставы и росказанья нашого справовал, мает ревизор под тою ж присягою, которою обовязан, винного не закрывати, але нам оповедати того на него, а мы учиним с тым, што ся слушного нам повидит.

Ревизор, где бы в ревизеи его помера еще не дошла, або непорадная была, мает мети до кождого двора одного слугу мерника, через которых померу справовати будет. А плату такому слузе на год по десети коп грошей з скарбу нашого.А от померы знову, альбо перемеренья брати мают по десети грошей с кождое влоки, а где бы только их поправляли, 2 грошы от волоки. А таковые мерники естли бы ся неслушне справовали и лениво для своего пожитку мерили, за то ревизор сам мает отповедати. Естли бы теж до колька дворов наших потреба мерников была, ино одного уставити и дати три волоки ему вольных ото всих повинностей, к тому войтовство одно, а то учинити за нашим ведомом. А не иный, хто обирати мает таковых, мерников, одно ревизор.

А где помера пойдет, мают мерити всякий грунт, купленый и заставный, кгдыж кметь и вся его маетность наша есть. А писати грунт, яко велики волоки вдолж и поперек и на которых местцах, и, естли бы с причины лихого грунту наддатки чинили, то мают при том же описывати. А где могут быти волоки прогоняные, ино там мерети в три поля, в которое поле 11 моргов, то есть, у волоку 33 морги з наддатком. А не могут ли быти прогоняные волоки с причин розных, ино морговати. А где без земянских грунтом не выпростуют ся, таковые земли беручи, нашими грунты мают отдавати, где бы земяном споруч к их именьями, и ровно яким грунтом возмут и колько – таким и так же ого отдати. А где бы ся ровный грунт на отмену не трафил, ино за волоку грунту преднего, средним грунтом полторы волоки дати, а за волоку среднего грунту – подлым две дати, как ся то учинит, а за волоку грунту преднего – дати подлого грунту три волоки. А где наддаток подлым, болотливым або песковатым грунтом приидет в отмену давати, и то даем на пильное уваженье уряду нашого, и ревизора и мерников абы нам и тому, у кого берут, шкода не была, для чого отмена абы не была давана без уряду. Але хто бы таковое отмены за упором приймовати не хотел, мают зостановити таковую отмену уписавши до книг того ж уряду нашого, а вряд мает напоминати его о бранье отмены, на чом естли бы не перестал и нам не обжаловал, упорне стены волокам и границы казил, и в оный грунт в померу взятый втуповал ся, того вряд наш мает моцно боронити альбо правом гвалту на таковом поискивати.

Ревизоры и мерники мают и на то бачность мети абы к прилеглым замком и двором села и всякие грунты наши прилучали, яко к которому двору ближей и споруч, а ведже так, ижбы ся можности и широ-кости тых врядов таковым перемененьем в подданых и в грунтех не зменшивало. Тые ж ревизоры и мерники мают ся доведывати посполу з урядом от войтов и от лавников и подданых о землях и всяких грунтех наших затаеных або от кого-колве забраных и то нам господарю доносити и оповедати водле присяги и повинности своее.

Поиск по сайту: