О судеревных лесех и пущах, и о бобровых гонех, и о бортех, сеножатех и оступах, и о лесех розмереных

Есть некоторые лесы, пущи и дубровы наши, до которых з стародавна шляхта и подданые их уступы и входы мают, восполок с поддаными нашими. О таковых пущах и лесех вси врядники наши и их наместники мают ревизором ведомость чинити и сполне ся том доведывати: хто, за якою справедливостью и яко много служоб людей входы свои мают, и выведавши певне, яко много того грунту мают, о том справу давати нам, водле которое ведомости, по великости и малости грунту нашого, комисаров зослати маем. А поколь комисары наши на то выедут, мает уряд подданым росказати, уживати тых грунтов по первόму, абы с держанья не были выпущоны, а пожиток до скарбу с того множити. Ведже где бы спор шол о реч ровную, меньшую альбо мало болшую нижли о волоку, тогды таковые речи может вряд с ревизором альбо с померчим кончати и становити не ждучи зосланья комисров от нас, абы ся для так ровное речи в замкненью померы волок омешканье не сдеяло. А вряд, як повинен, с пильностью мает дозрети, иж быхмо шкоды в справедливости грунту нашого не мели. А лесы на волоки розмереные, где годно, на пашню людми осажати и вольности мает давати уряд на пят альбо на шесть лет, аж и до десети, и то мает быти там где чорные лесы и тяжкие к выробленью, и то даем на бáченье врядовое, а ревизор, приехавши, вольность тую уживати и цынш постановит, по вывыседенью воли платити, водле уставы. Ведже таковые лесы, где бы на пашню згодити ся не могли, померяючи не мают прогоняти и порубывати, одно в около обмеривши и границы положивши пописати довгость и широкость шнуров, и колько волок и моргов, яко ся вымерит, и зморговавши на реистры пописати. А ведже от таковое померы меньши брати, то есть, от десяти моргов грош 1.

А где сеножати в пущах наших суть, ино вряд и лесничий мают давати ведомость ревизору, а ревизор мает, где бы потреба была, до двора нашого таковые сеножати привернути альбо межи подданых на плате роздати. А подданые на косьбу вси, колько их поймут, одным разом мают ходити оповедавши ся лесничому. А ручницы, пса, рогатины и ничого, чим бы зверя забил, не брати ему з собою А где бы межи пущою болота и лесы грунту на пашню годного меньши трех волок было, там людей не садити, для злодейства и прокладыванья мыт, але платы роздавати. А в оступех и ловех наших проробков и сеножатей никому не мети, водле уставы.

Ловы и оступы в пущах наших ревизоры з лесничими и теж осочники, почавши от Беловеж аж до Ковна, порядком слушным росправити и росписати казати мают на розные часы для волнейшего перебыванья и ведомости о зверу, и яко много до которого оступу людей потреба, и о далекости межи собою то постановивши в реистр вписати и на вряд зоставити, абы за ведомостью потребы певное людей, з далеких волостей их не гнано, гдыж и без того обойти ся можно. А подданые наши тяглые и осадные кождый з волок своих повинни будут до оступов наших пешо ходити и з возами. А поколь в ловех наших мешкати будут, потоль на иншие роботы ходити не повинны. Але хлопята и старые абы в ловы не ходили. К тому теж вряд без ведомости листу и росказанья нашого, подданым в ловы выгоняти не мает, под ласкою нашою.

Бортное дерево наше все абы вряд в своей ведомости мел, чого ревизорове доглядати мают. Дани теж медовые водле старых звычаев ити мают с пущ а ульев домовых, и з бортей на (своїх) волоках жаден с подданых плату давати не повинен. А за борть шляхетскую, которая бы ся подданому у волоце достала, так с пчолами, яко пустая, мает быти заплата водле статуту. То есть за борть пустую, 15 грошей, со пчолами – 30 грошей. А хто бы заплаты приняти не хотел, тому вольно борть своею зо пня спустити и взяти.

А во всих наших и обчих пущах, где перед тым подданые наши бобры на нас гонили, и теперь первому гонити мают. А где бы ся в реках и в озерах наших ново бобры показали, и там ловити мают. А за працу их брати им бобра пятого альбо почеревье от кождого бобра. А где подданые в пущах наших лазни для входов мают, при таковых лазнях абы конечно быдла и собак не ховали, чого им врадник и лесничий боронити мают.

Вольность подданые до пущи нашое, хотя иж и головное, ведже не глубоко мают мети, по дрова, по хворост на огороженье, по дерево на будованье, по лыка на свою только потребу, а не на продажу. А где для оступов закажут им, ино поколь заграничат ревизорове, того уживати, и то, так абы на одном местцу брали. А робятам и невестам губ, овощу лесного всякого, ягод и хмелю во всих пущах наших не боронити. А на своих волоках подданым вольно забити волка, лисицу, рыся, росомаху, зайца, белку и иншый зверь малый, также птахи всякие, и продати кому кому хотячи и не оповедаючи вряду, але серны и иншого болшого зверу не бити и на своих волоках. А особливо в пущах и под пущами нашими ручниц ховати и жадного зверу ловити не мают, под горлом.

Вольность подданым до рек и озер наших рыб ловити крыгою: удою, броднем, тригубицею, обором и иншими малыми сетками, уряд и неводничий не мают заборонити, нижли езов забивати не могут. А месяца апреля, мая, июня ни чим рыб не ловити, в озерах только, для множенья их в тых же месяцах, чого уряд и неводничий заборонити мают. Ведже в реках волен завжды подданым улов на рыбы.

Подданый убогий и недостаточный, часов голодных засеявши пашню на зиму, кгды отходить кормити ся, мает оповедати ся врядови при войте и указати убожство и недостаток свой, для чого то учинити мусят. И у такового подданого домовство и засевок не мает быти бран аж до святого Яна. А не вернет ли ся до часу, тратит засевок и будет то все отдано иншому, без поклону врядничого. А который бы человек не оповедавши ся вряднику при войте утек з волоки, тую землю зо всим домовством, што ся останет, иншому дати, а збеглого сам вряд и через войта искати мают. А где его найдут, а выдати не схотят, ино правом доходити. Пак ли сам отходен после часу назначоного альбо збег, правом зысканый, любо и без права, вернет ся, таковых на пустых волоках осажати. А естли за кривдою от врядника и войта выйдет подданый, а потом прийдет назад, ревизор винности его мает ся доведати и уважити причину, естли припустити его к засевку и будованью, альбо ни.

Продати на волоце будованье и домовство подданому вольно перед урядом, при войте и лавниках. А тот, хто купитит, осадивши волоку свою, который бы дуж потягли тягнути, может уместе або на пустой волоце сести. И тот, хто купит, не мает больш дати врядникови только 2 гоши и записного в реистр грош. А естли в том уряде нет места и волоки пустое, ино ему до иньшого именья нашого вольно ити вземши лист от уряду до того, куды ся переносит, иж добровольне вышол, волоку осадивши, и в том ему перед урядом або войтом уистити ся, штобы инде не шол, только до волости нашое.

Везде при селех наших волоки пустые альбо не принятые и роздробленные вряд и ревизоры, при бытности своей, людми добрыми осажати мает и писати в реистр которого дня и часу их приймут, с которых волок. Поколь ся збудует и волоку направит, до лет двух альбо трех не мает больше дати за вси повинности, только грошей 42. Снявши жыто и ярину а роботы и подвод и никоторых потяглей не тягнути поколь ся побудует. А то на узнанье врядовом и ревизорском, естли (поселенець) близко и лацно будованья досягнути может. А приемного не брати больш, только 2 гроши на державцу, а дьяку – грош. А никому пустых волок а ни сеножатей на них не наймовати и за поклоны, а ни за скарбные доходы не давати пахати никаким обычаем.

У подводы далекие альбо для будованья замков и дворов подданые наши ходити повинни. И водле великости часу помешканья там и далекости дороги мают ся складати с трех альбо с чотырех волок на один воз альбо на роботника одного (а не мает нихто таких подвод и робот замышляти, олиж за нашим листом). И за то будет отпущано подданым с платов за волею нашою водле замешканья их там на той послузе нашой. А будованье и воженье дерева, и подводы до дворов близких и прилеглых, то мает быти на бачности вряду и ревизоров наших. Ведже кгды бы што поважного робити мели, мают ся пытати у нас, а в небытности нашой – у подскарбия нашого. А старостове и тивунове подвод жадных от подданых наших на свою потребу а ни приятелей своих брати не мают под утратою уряду, а врядник, где бы их брал на свою альбо чыю иньшую потребу, горло тратит. А кгды вряд едет с пенязми до скарбу до Вильни, тогды войтове колеею по року кождый з войтовства своего под пенязи подводу мают давати, то есть под пятьсот коп подводы две, а под тясячу коп – подводы чотыри. И которые с подданых с пенязми поедут, тым со всего войтовства того мает быти складано – за кождую милю от одного коня грош 1. Тым обычаем не прийдет то в другой волости на войтовство раз в кольку летех, што мает быти в Жомойти и во всем Великом князстве Литовском. А где бы теж за листом и росказаньем нашим люди осадные збожья альбо товары лесные до портов возили, тогды им в цыншах так же фолкга мает быти уделана.

Естли бы подданые за росказаньем нашим листовным каменье возили, тоды им за то в цыншах та-кож фолкга мает быти вделана водле замешканья их на той послузе нашой. А на спущенье дерева с пущи Марковское, вси подданые наши волости тамошнее мают быти на тяглую службу постановлены, так яко Волкиницкие, которые за дни им повиноватые дерево и дрова спущати до Вильни будут повинни. А гды бы тая волость водле потребы нашое тому досыть вчинити не могла, мають быти на то отлучены люди от одного альбо двух дворов наших, которых также на тяглую службу постановити и к той службе с потребу их привернути.

Мосты на местцах звыклых подданые мают подданые мають робити, как бы безпечный переезд был, кождый за своим войтом. А коли войт недбало ся заховывает, ино вряд его мает напомянути и естли не-послушны подданые войта, ино их вряд кажет выгнати к той роботе за войтом. А на гостиницах и дорогах, где мы господар с двором нашим едем, там, за дозреньем врядовым, звыклыи мосты робити. А за то ничого на подданых врядник и мостовничий его брати не мают. А мостовничий, от нас посланый, мает только лю-дей боярских у мощенью мостов доглядати, абы были добре зароблены. А естли бы подданые, за росказаньем и листом нашим, мосты мостили незвыклые и им неповинные, за то им будет отпущено с платов наших. А поддаными тяглыми мосты робити за дни им повиноватые.

На сторожу замков и дворов наших чергою подданые ходити повинни, але не больш их вряд брати мает, одно яко ревизор уставит. А ревизор не мает уставляти сторожы, только водле потребы великости и важности дворов наших. И с тых же сторожов до коней наших, где будут стояти, до кождое стайни – один сторож, а до двадцати волов кормных. также одного сторожа ставити.

Ремесленики всякого ремесла мают быти на одной вольной волоце ставлены от ревизора при всих замках и дворех наших водле потребы, а звлаща при гостиницах и тых дворех, в которых частей бываем. То есть тесли, ковали, слесары, колодеи, бондары, рыболове, грабары. И тех ремеслеников не мает уряд до домов своих посылати а ни роботами своими забавляти.

Позвы жадные и децкие от панов воевод, также и в земли Жомоитской от старосты, абы не были да-ваны на подданых наших, але вряд, под которым есть подданый, мает с ним справедливость неомешканую водле справ делати. Также теж естли подданый панов-рад наших, з особна стану вшелякого, вчинити бой який, кривду або грабеж подданым нашим, старостове, державцы, тивуны и их врядники мают подданым на-шим во всем справедливости доводити, так, якобы ся подданым нашим на всем кривда и шкода нагородила. А посылати врядови своего слугу з войтом за кривдами подданым без вымовы. Которому слузе врядничому помильного от кождое мили по грошу, ино, коли что презыщет, а не зыщет ли, на том ничого не брати. А хто бы справедливости делати и шкод нагорожати подданым нашим за обосланьем врядовым не хотел, к таковому вряд мает ся заховати водле статуту. А которые оселости и людей не мают, тогды вземши лист от уряду к справе рок положити. А ен станет ли альбо напозов не отзовет ся, мает уряд зослати и, с права грабеж вчинивши, шкодному дати (те), што бы за его шкоду стояло.

Многие з шляхты и подданых, уживаючи мысливства, збожья и ярины подданых наших топчут и шкоду им чинят. Таковое шкодливое мысливство мает быти от уряду заказано и боронено. А хто бы ся не уймет – правом его о то умовляти и шкоды позыскивати.

Старостове, державцы и тивунове абы злодеев и иных злочинцов карати казали водле статуту, без вины злодейства, которая перед тым бывала. А маетности злодейское и кождого злочинца абы конечно на вряд (забирали) и никого иного не брано: одно, при земли жону и детей зоставити. А не будет ли жоны и детей, ино иншого на том осадити.

Так теж отумерщин и отбегщин абы конечно брати не смел, але на той маетности и том грунте инших годных подданых наших осажали, а бы тым не множили ся пустоши.

Повинность замку Виленского пан воевода з волостей воеводства своего Виленского поднял ся опа-тровати, по тому, яко з стародавна бывало, и набольш. А иншое все, и теж повинность замку Троцкого, з скарбу нашого опатрована быти мает, кгдыж вже люди на волочных платех и повинностях суть осажоны и постановлены.

В земли Жомойтской в дворех и волостех наших шляхта, которые были за староства пана Станислава Яновича, рекомого Кезгайла, и за сына его пана Станислава Станиславовича, тые мают быти вси захованы при тых же вольностях шляхетских. Леч которые бы по зеистью их и за вкупы своими зостали бояры, таковые вси абы ровного права з шляхтою не вживали и в повинности волочные тых и их земли обернены мети хочем и в том обязуем повинность урядников наших водле их сумненья абы сами и з ревизоры и мерники того постерегали. А кому бы листы наши к листом старостиным на шляхетство приданы были, то мает быти отложено на вырок наш. А також и о тых всих, которых бы становил ревизор на платы повиноватые, а они показали бы листы панов старост Жомойских, тогды тые листы мает ревизор перед нами оказати, для ведомости певное, с которых причин того права и вольности шляхетское альбо боярское хто доступил.

З волостей Руских меды и иншие доходы мают быти по старому браны и по тому, яко на сесь час, до иншое науки и постановленья нашого.

Кгдыж вже через ревизоров и померчих о всих грунтех и подданых наших вшелякая ведомость до скарбу нашого дошла, хочем мети абы по смерти старост, державец и тиунов знову увяжчие подданых наших не пописывали и списного, и стацей никоторых на них не брали под ласкою нашою и нагороженьем совито шкод подданым. Одно мают реистр ревизорский з скарбу нашого взяти або з реистров войтовских во всем справити, што в том уряде прибыло або теж спустошало и з якое причины. Которая ведомость и досветченье при вряде, войте и лавниках мает быти. А по смерти старост, державец и тивунов наших, естли бы была потреба всыланья на вряд от панов-рад альбо от пана подскарбия, тогды тогож ревизора послати, который там на ревизии будет. А што с третьего снопа врядничого там зостанет, мает ревизор на золшлого половицу дати, а другую наставаючому вряднику и собе на выхованье взяти. А што ся дотычет замков наших украинных, там, по смерти врядника нашого, мает быти послано от нас або от панов-рад наших, которых вряду то належит, для острожности от неприятеля.

Хочем мети абы вси уходы до пущ и лесов, озер и рек наших, и забиванье езов, и дерево бортное, и сеножати и иншие всякие пожитки на грунтех властных наших никому иному, одно подданым мест и волостей наших от уряду на цыншах и платах даваны были для примноженья пожитков скарбу нашого, чого ревизорове пильне выведывати и стеречи мают, ижбы то было без шкоды нашое, абы теж такими вступы и уходы, за вкупы и поклоны, нихто властности нашое забирати нен мог.

Хочем теж мети абы в пущах наших лесничие никому дерева стоячего на будованье а ни на жадную реч пожитков своих давати не смели под строгою карностью нашою. Ведже лежачое дерево могут давати, але не иншому кому, одно нашим подданым, которые бы на волоках своих к их потребам лесу не мели.

А во всих тых справах около розмноженья пожитков наших и порадности господарства в помере грунтов наших, обравши на то первей сего справцою, поручили есмо державцу кнышинскому пану Петру Фалчевскому, гдыж и на сес час, подле оного первшого злеценья и сее уставы нашое, хочем мети. Где бы в котором именьи нашом потреба указывала, абы он з нашого росказанья догледал и доезджал, яко около померы, так и в иных речах господарству належачих, становячи все то к пожитку скарбному, подле воли нашое господарское.

ІІ

Того ж року 1577, месяца октября 20 дня, господарь король его милость и великий князь Жигимонт Август рачил поправовати некоторые артыкулы, в той уставе вышей описаные, с причин певных, от пана Петра Фальчевского поданых, и росказует его милость господар абы всем тые артыкулы, нижей описаные, при уставе ревизоры оповедали и становили:

До артыкула 3-го о конюхах седельных и инших, то его королевская милость рачил росказати доложити: конюхи, также и вси слуги дворные садити одным селом в кождом уряде и також волоки мерети в три поля, и в среднем поли их садити, как волостных людей.

До артыкула 4-го, о стрельцах, то его королевская милость рачил росказати доложити: стрельцы садити межи тяглых людей пересажаючи иншими людми, ижбы не посполу седели.

До артыкула 6-го, о осочниках, росказал его милость господар то доложити: осочники на границы Пруские перенести с поля, где только потреба, двух або трех, а инших обирати с тых, которые там перемешкивают альбо осажоны будут.

До артыкула 7-го, о войтах, росказал его милость господар доложити: войты тяглые абы мели на войтовскую службу по две волоки вольных от всих потяглей и податков. А где села грунтами и поселеньем прилегли, там триста и чотыриста волок может один войт справовати, звлаща где осадные люди, а не тяглые. А большей то в земли Жомоитской мает быти, гдыж робот а ни отозвов там не встановлено. А при обиранью на войтовства, войтове и лавники присегати мают, водле первое уставы.

До артыкула 9-го, о местех, то его королевская милость мети хочет абы при больших местех войтом по две волоки давны, а в меньших, звлаща где не на гостинцу, войтом по одной волоце давати на их службу войтовскую, от платов и повинностей вольные абы тым хтившым к порядку были.

До артыкула 13-го, о корчмах, доложити его королевская милость росказати рачил: корчмы покутные, князские и панские, звлаща где не на гостинцу абы были гамованы и забираны от уряду его королевской милости, хотяж бы и листы его милости господарские мели,бо таковые покутными корчмами не одно шкода его милости господарю, але речи посполитой, дорогость в живности и знищенью убогих людей.

До артыкула 18-го, около отдаванья сына и овсов. Рачил его королевская милость росказати доложити абы при отдаваньи овсов и сена не давано больш, одно яко в уставе описано. А войт за квит не мает больш дати, только один грош служебникови конюшого. А конюший квит до кождое державы один мает дати, за который 12 грошей брати ему.

До артыкула 24-го, о зрбленье пашни, по тому его королевская милость заховывает, яко вышей описано: иж мает быти на кождую волоку фолварковую зоставлено по семи волок оселых с волы и с клячами на робленье пашни. А к тому, естли бы вряд розумел, иж тыми людми пашни заробити не может, и будет ли того потреба, мает толоки збирати на хлеб дворный (на што з гумна его королевской милости збожье взяти мает), а подданые будут винны на такие толоки ити. И кгды ревизор приедет, обачивши што слушным урядник учинил, мает в ревизии описати, абы было ему на личбу принято.

До артыкула 27-го, о млынарех. Росказал его милость господар доложити, абы млынары з волоки, которая им будет дана на млынарство, по два дни тесельскою роботою служили до замку альбо до двора, а не по одному дню, яко в уставе выше описано.

До артыкула 29-го, о конях, то его королевская милость доложити росказать рачил: кони врядник его кождый у своем дозренью мает мети и сам отповедати естли зле будут хованы, бо то его королевская милость на врядника, а не на машталера, здавати рачит, для чого при таковых конях мает врядник своего служебника слати до господаря.

До артыкула 36-го, о ревизорах. Поправуючи его королевская милость рачил росказати доложити: ревизоры со всею справою своею мают ся зъезжати до Вильни на певный час, который им будет ознаймен. Ижбы теж и пан Фалчевский на тот час вызван был и при нем справу ревизии своей отдавати и справовати ся повинни в скарбе або кому то его королевская милость поручити рачит. И во всем ся с паном Фалчевским порозумевати мают, абы везде одинако справа волочная шла, по тому, яко у него у Книшине.

То теж особливо его королевская милость хочет мети, абы на пустых волоках вольно было подда-ным паствити быдло и жаден врадник абы не смел грабити быдла подданых на пустом, хотя бы и на сеножа-ти, кром збожья засеяного на пустовщизне, с чого бы плат мел быти.

О ревизорах до земли Жомойтское хочет его королевская милость мети, абы ехали и водле первшой науки справовали ся: ведже где покажет ся в реистрах померчих, што будут наддатки давали на грунты подлые, таковых волок знову шнуров не пробовати, кгдыж пан Фалчевский поведил, иж у всих мерников есть в реистрах описано, што на звыш на которую волоку дано и з якое причины. А про то таковые реистры мают быти даны до скарбу, абы ведомость была всякого грунту в земли Жомоитской в скарб.

Есть теж воля его короловской милости, абы с пенязей, с гумен браных за збожье, быдло до фолварков панове врадники куповали, звлаща коровы, а с того пожиток до скарбу его королевской милости примножали, чим теж и рольи фолварков направовати ся могут. А што таких пенязей гуменных на быдло выдавати будут, то на личбе мает быти приймовано.

ІІІ

Устава на товары, на шинок и на ремесленники. Хто едвабными речми торгует, мает дати чотыри грошы, а хто только сукны и иными крамными товары торгует – мает давати два гошы, а от золотаря также два грошы. Хто шинк, корчму держит, тот дает от меду один грош, а от пива – один грош, а от горелки – два грошы. Резники, кождый того ремесла уживаючи, один грош винен дати. Кравцы, кушнеры, шевцы, ковали, стельмахи, рымары, сыроматники, дуботолки, седляры, гончары, токары, шкляры, пекары и кождого ремесла хто-колве уживати будет и обходити ся ремеслом, в месте седечи, мает з ремесла такового дати один грош, але от товарышов не повиен платити. А отдаючи тые доходы, бирчого и писчого не повинен дати больш одного пенязя, хотя мало альбо много даст.

Ведже хто бы с таковых купцов альбо з ремеслеников, хотя одным товаром с тых речей менованых и на один раз в месте торговал альбо ремесла уживал, тогды тое ж от товаров своих и ремесла мает дати и заплатити, яко и тые обечне в месте перемешкиваючие, платячи то на раты уставленые. И вольно ему будет на целый год такового торгу уживати. А для того вси купцы и купчики во всих местех мают ся вписати в реистр урядовый, чим хто з них торгует. Естли ж того не всхочет, а трафит ся едвабные або якие иные незвыклые в его купецтве товары, тогды мает заплатити от того по сей уставе и вольность мети тыми купчити от чого заплатит.

А отдавати тые пенязи до вряду замков и дворов его королевской милости, на две раты розложивши: на новое лето половицу, а другую половицу – на день святого Якуба. А после року у двух неделях кождый врядник мает их до скарбу отдати. А земянские люди, хто повинен носити подводу, подле ухвалы земской на сойме вчиненой, мают платити з службы по шести грошей. И на тые ж роки повинны врядники господарские отсылати тые пенязи до скарбу его королевской милости. А за тые пенязи кони на подводы наймованы быти мают.

IV

Устава о подводах. Во всих местех и селех где потреба, а вызволены места от подвод – на предместьи, хотя где сего часу подвода не давана, мают ховати кони на наем подводы.

А где волоки суть, тые мещане, которые волоки держат, будут повинны ховати кони и стеречи подводы переменою по неделям у ровности. А мети кони кождому по два. А хто всхочет больш мети коней, ино таковый мает ховати то на свою властность.

А войт кождого такового местечка и села мает два кони ховати, а от даванья подводы будет волен для того, абы порядку даванья подвод догледал. А станет ли омешканье гонцу – то войтова вина и строгая карность на него от господаря его милости взложена будет.

До всих замков и мест немногие дороги и гостинцы росписати от столечьного места Вильни, абы чужоземцом, збегом и шпегом, лихим людем вольный проезд, а мыту господарскому шкода в прокрадыванью купцов не была. А класти гостинцы яко напростей может быти. И так по всей земли розложити гостинцы и станы певные, на которых подводам отмена мает быти. А не становити подводы нигде больш семи миль и меньше трех, и то алиж бы инак не могло быти, ино в чотырех, в пяти, в шести милях отмену становити, хотя в князьских и панских местех и селех, где подводу носити повинно.

А коли прийдет посол великий альбо будет отвоз речей господарских, на што бы таковых коней больш потреба была, ино тое место альбо село мают ся способляти, яко бы тых коней водле потребы зготовали, бо о таковой потребе могут перед часом ведати. А которые то повезут, так мещане, яко и волощане, абы им также плачоно было помильное, яко нижей описано. В чом хотячи порядок учинити, постановили есмо, абы в дому войтом, бурмистром, альбо лавником подвод отмена была.

А мает быти плачоно от коня по грошу на милю, так же один грош от подводного коня, яко и от того, на котором проводник едет. А от возовое подводы одным конем полтора гроша на милю, а от двух коней до одного воза – полтретя гроша на милю. А естли бы своим возом двумя коньми повез, тогды от воза з двумя коньми три грошы мает быти дано на милю. А естли бы теж тот подводник мусил и назад на той же подводе нести гонца, ино ему платити по тому ж. А не понесет ли гонца, тогды и платити ненадобе. А мает гонец и кождый посланец наемнику пенязи вси зараз дати, а то для того, абы ратовати мог, естли конь рознеможет ся або здохнет, штобы мел за што иного коня наняти, а не омешкати гонца.

Гонец мает ехати до уряду господарского за листом господарским подводным. А уряд войту альбо бурмистру и лавнику, тому, хто на то уставлен старшим, кажет ему подводы дати, колько на лист его милости господарском любо на лист панов-рад, также и на лист старост и державец украинных описано. И напишет на листе подводном которого дня брал подводу, абы за одным листом, естли не описано в листе, не брали подвод по двакрот, яко то многокрот чинили до сего часу.

А будут ли ознаймены особы певные при дворе и скарбе его милости господарском, хто тые пенези на подводы роздавати мает з скарбу беручи и которые отправуючи гонца мают давати на наймованье подвод, яко далеко едет на кождую милю по одному грошу, а на страву только ж на особу его и слугом его, колько с ним будет, также по одному грошу. И назад на страву мают ему платити, а он вже будет наймовати и платити тым, которые обраны ховати тые наемные кони. Нижли хто возом едет, тот не так ся борзо поспешит, для того и на страву мает ему дано быти на милю полгрошком больш. А ведже мают розумети на таковых гонцов, который сам один с слугою або с двумя посылан бывает. А хто с большим почтом едет, такому мает быти больш и дано, водле особы и потребы, на што тот, хто в справе своей мети будет, мает бачным быти и з его королевское милости таким посланцом отправу чинити.

А дворанин на подводе едучи, не мает через перемену далей на той подводе ехати и у переезчих теж людей коней не мает брати. А естли бы то учинил, тогды совито повинен будет шкоду нагородити, а за так неповстяжливый выступок две недели у вязенью седети, а на тую послугу николи посылан не будет, абы тым ся и иные карали.

Нижли, естли б подводный конь устал альбо здох, тогды мает оный гонец у переезчого чоловека альбо где на селе при гостинцу коня наняти. А проводник тому, чий конь будет, заплатити мает так же, яко ему плачоно (кгдыж пенязи за наем от гонца взял), для того, абы посланцом его королевской милости и паном-рад и с украин потребам земским нигде ся омешканья не было.

А с украин мают панове воеводове, старостове и всякие врядники посылати посланцов, даючи свои пенези на подводу. И кгды приеедет таковый посланец, ино взявши ведомость в канцелярыи с якою справою послан и хто посылал в земской справе, таковому кождому через посланца его мает быти заплачоно за наем подвод. А хто для своее потребы шлет – тот своим накладом и отправляй, а господарских подвод не працуй. Для чого, о земском деле шлючи, своих потреб на таковых посланцов не вскладали, ижбы тым не омешкали в справах земских, ожидаючи делам пана своего отправы. Але гонец с делом его милости господарским и земским отправовати ся спешне мает, ничим иным не забавляючи ся.

V

Тогож року 1557, месяца октября 20 дня, его королевская милость рачил роказати до тое уставы наподводы приписати: купцы чужоземские, которые колвек до панства его королевской милости приезжают с торговлями и домов своих не мают нигде в границах панства его милости, на таковый податок для наймованья подвод неповинны складати ся, кгдыж мыто платят.

Што теж описано вышей в той уставе “абы на две раты розложивши тот податок на подводы отдава-ли”, его королевская милость хочет мети, ижбы завжды тот податок отдаван был на новое лето и таковый бы податок врядники завжды при цыншах отбирали.

VI

Лета Божьего нарожеья 1558, месяца мая 20 дня, господар король его милость и великий князь, росказавши розсылати ревизоров и мерников, рачил поручити то ознаймити и к справе доложити: иж вси тые ревизоры и мерники, в небытности его королевской милости в тутошнем панстве, едучи на ревизию и на померу, также и зъехавши з справы и з ревизии своей, мают съезжати ся с паном Петром Фалчевским, яко с тым, который около порядку того господарства з ними намовляти, и, чого бы которое именье господарское потребовало, так в порядку померы, яко теж и в господарстве и в пожитках его королевской милости, раду и науку давати будет. А он, в чом потреба, докладати ся будет пана воевоеды виленского, маршалка земского, канцлера Великого князста Литовского, старосты борисовскогои шовленского его милости пана Миколая Радивила, кгдыж господарь его милость на пана воеводу виленнского то преложити рачил, абы пан Фалчевский и вси в тую службу поставленые наукою и помочью, и обороною во всих справах, што бы ся належало до пожитков и грунтов господарских.

К тому, будучи они на таковых службах его королевской милости, мают с паны врадники порозумеваючи ся именей егомилости господарских догледати: где ся подданые розделили, а много их в одном селе, а на малом грунте. Таковыми абы пустые волоки осаживаны были, зоставивши брата одного або двух на волоце або отца з сыном. А давати им вольность, на пустых волоках осаживаючи, для вспоможенья, яко вышей описано.

Теж, абы того врядники догледали где подданым к розробленым волокам лесы приданы для будованья и дров, так местским яко и волостным, ижбы только на свою потребу их брали, а не продавали.

Што ся дотычет стрелцов, господар его милость на том застановити рачил, за их чоломбитьем: ач на уставе описано не давати им цыншов з двух волок, але иж теперь больший почот их, нижли первей было, и притом подвязали ся сами платити цынши и осады со всякими повинностями, так, яко и осадные люди, пенязми, кром роботы и потяглей; и господар его милость росказует: кождому з них дати по две волоки и осадити их селы на добрых грунтех и поодаль от пущы. А они мают одну волоку мети вольную от платов, а з другое платити будут цынш и весь податок, так, яко иные осадные люди, ведьже а ни сена, а ни овса, ни жадных отвозов альбо подвод и потяглей не повинны давати, только голый цынш альбо плат им ознайменый, до вряду, на чией волости седят з ведомостью служебника пана Довойны. А судити ся им, стрельцу с стрельцом, перед тым, кого пан Довойно уставит над ними. А коли с ким иньшим суд, ино пана довойнов слуга, за обосланьем з уряду, мает его становити на суд врядничий, и сам на том мает быти и посполь з урядником судити. А где бы ся пригодило с подданым нашим судити стрельца, о покаженье або переоранье межы, потому ж мает вряд наш або войт волостный, посполь с тым служебником пана довойновым, тую реч судовне водле уставы нашое застановити. А при роздаванью волок стрельцом мает там быти теж служебник пана довойнов.

VII

Лета Божего нароженья 1558, месяца июня 20 дня, господар его милость и великий княз Жигимонт Август рачил намовляти с паны-радами их милостью о даванье подвод и выроком своим господарским на том застановити, яким обычаем мает быти порядок справы и повинности тое земское становлен во всих местех, местечках и волостях руских его королеской милости, кроме мест упривилейованых вольностью от подвод. А ведже и в таковых местех на передместьех перемешкиваючи абы платили по тому, яко нижей описано, не выймуючи с того никого и чий-колвек чоловек седит в месте господарском и на предместьи, одинако платити мает, яко и мещане.

Мещане всех мест абы давали с кождого дому по два грошы. А хто волоки держит, тогды особно от волоки мает дати три грошы. А от моргов при местех, по чотыри пенези, а от прута огородного местского – один пенязь. А где волоки еще не мерены, ино по два грошы, а с фольварка местского або с пашни – по шести грошей. А в котором фольварку люди, ино с службы по шести грошей, а от огородника – по два грошы.

А руские волости, где волоки не мерены, мают дати с дыму такового, в котором земли своее и особ-ного хлеба уживают, грошы два с хлеба, а с дерева бортного – грошы три с лезива. А хто того обоего не уживает, только на огороде седит, тот от огорода грош один дати мает. А хто и огорода не мел бы, тот мает з дыму дати пол-гроша.

Акты, относящиеся к истории Западной России, собранные и изданныне Археографической комиссией. СПб., 1848. Т. ІІІ. №19. С.72-95.

* Упорядники 2-го тому АЗР вважають, у цьому артикулі через помилки або пропуски текст зіпсовано.

Поиск по сайту: