О днях личбами назначоных и о писарех скарбных и абы вряд пенязей при собе не задерживал

К тому хочем мети абы врядники в пожитках наших так заховывали ся а платы и доходы, што-колвек может быти выбрано, отдавали в скарб наш первей свята Божего Нароженья. А отдавши пенязи, врадник мает взяти квит от подскарбего в личбе альбо от писаря скарбного. За который квит не мают больш брати в скарб только два грошы. А может ли и личбу учинити на тот же час, мает быти слухан, и по личбе чого справят ся, квитовати такового. А пенязи и личбу отбирати на замку нашом, где дом з росказанья нашого указан будет. А брати личбу по реистром и уставе ревизорской. А там, где ревизор не был, ино по первой уставе. А певные часы врядником всим чинити личбу складаем от нового лета.

Напервей личба починает ся генваря первого дня с земли Жомойтской, с тивунств и с держав тамошних, то есть: с Плотель, с Тельш, з Биржан, з Биржанян, с Тверы, с Гондинги, з Дирван обеюх половиц, з Ужвенты, з Ретова, з Шовдов, с Поюрья обеюх половиц, з Вешвани, з Ойраголы, с Коршова. А доконают ся дня 15 тогож месяца.

16-го дня генваря почнут ся личбы з Велены, с Керстомони, з Росиены, з Ясвойни, з Вилькеи, с Крож, с Боток со всее волости Упитской, кгдыж там фольварков нет. А доконают ся дня 1 февраля.

2-го дня февраля почнут ся личбы з восковничого виленского, с ключа Луцкого и со всих мыт волынских и подляских, и руских с корчмами, с ковенских мыт и жомойтских. А доконают ся личбы 23 дня у вилию святого Матея.

А потом, февраля 24 дня, почнут ся личбы з замков и дворов Троцкого повету: с Берестья, з Милейчич, з Мельника, з Лосич, з Дорогичина, и с подымного с Каменца, с городка Высокого, с Тыкочина, с Книшина, з Забелья. А доконают ся 6 дня марта.

7-го дня того ж месяца марта почнут ся личбы со Мстибогова, з Зельвы, з Вольны, з Волковыска и з войтовства тамошнего, з Лыскова, з Межиреча, з Слонимского староства, з Лососиные, з Байкович. А доконают ся марта 17 дня.

Того ж месяца 18 дня почнут ся личбы с Белицы, с Ожы, с Перелома и з неводничством, с Перевалки, з Василишок, з Острыни, з Мереча и с фольварков тамошних, с Коневы, с Дубич, з Радуни, з Ейшишок, з Ворон, з Волькиник и Лепун. А доконают ся марта 28 дня.

Того ж дня почнут ся личбы з Олиты с фольварков и неводничества тамошнего, з Ситна, с Берштан, с Дорсунишок, с Ковна, з Румшинок, с Кормялова, з Соломишок, з Жижмор, з Жослей, с тиунства, с городничества и с ключа троцкого, с капщизны места тамошнего и с капщизны места Городенского. А доконают ся личбы с Троцкого повету до дня 7 априля.

8-го дня месяца априля почнут ся личбы с замков и с дворов повету Виленского, з Бряславля, с Друи, и с неводничеств тамошних, з Дисны, з Довгялишок з неводничством, з Ляхович, з Айны, с Красного Села, з Маркова, з Мядела, з Лебедева, з Дунилович, с Ушпол, с Пенян, з Абелы, с Утен, з Оникшт, з Вилькомира, з Воложина, з Болник. А доконают ся того ж месяца 21 дня.

Априля 22 дня почнут ся личбы з Лиды, с Траб, з Гераноин и с фольварков, с тиунств, с неводничества, с городничества, с ключа и с капщизны виленское, с капщизны новгородское и от права майтборского тамошнего, с капщизны царинское и з места Менского, с Крева, з Ошманы, з Медник, з Любова, з Рокантишок, з Виршун и з млына виленского. А доконают ся личбы повету Виленского мая 5 дня.

6-го дня месяца мая почнут ся личбы з волостей Русских: напервей з Речицы, з Мозыря, с Бобруйска, с Чичерска, с Пропойска, зо Мстиславля, зо Ршы, з Любеча. А доконают ся 18 дня того ж месяца.

19-го мая почнут ся личбы з Гомья, з Глуска, з Могилева, з Свислочи, с Борисова, з Любошан от права майтборского и з бобровничства полоцкого. А доконают ся личбы з волостей Русских остатнего дня того ж месяца мая.

А иные дворы, которые кгды будут влучоны в тую справу, мают ити в личбы тых днев и в тые ж поветы кождый к которому належит и в тых часех назначоных кождый урядник мает личбы отдавати первого дня, яко которым державцам писано к личбе становитии оказати ся подскарбию нашому. А подскарбий мает росказати писаром скарбным их отправовати и личбу брати ничим не задерживаючи.

Про то хочем мети двух писаров скарбных на приймованье личбы, которые ижбы одностайне, однакою моцью и згодливо, кому подскарбий отправовати роскажет, пильне догледаючи пожитков наших а маючи реистры прошлое личбы. И в чом бы вонтпливость альбо шкоду бачили не мают того никому замолчивати, але подскарбию оповедати, а подскарбий – нам. И во всем послушенство абы чинили к подскарбию и всякие справы нигде инде, одно к нему доносили.

Также и реистры личбы с одного складаючи к подскарбию приносити мают. А без ведома подскарбия писари скарбные, яко личбы, так и пенязей, приймовати не мают. А за квиты абы болш не брали дьяки скарбные, только 12 грошей. И не давали бы розных квитов, ино вси доходы и пожитки одного двора с фольварки, а потом гумна со всим господарством на одном листе выписавши, и в чом бы ся урядник усправедливил прошлое личбы (што на ревизора оставлено было), со всего один квит дати. И в том же квите описывати, где в котором уряде што прибавлено, а што зменьшило пожитков. И за писанье квитов тых дьяки не мают болш брати, только 12 грошей, хотя бы на аркушу целом и болшей писано было, то всего за один квит грошей 14.

А над то таковым писаром скарбным з ласки нашое з скарбу давати на год за их службу и на страву кождому з них по 160 коп грошей и по 15 локот одамашки. А на их слуги и дьяком обоим по поставу сукна колтрышоваго.

Тые ж писари скарбные не мают ся забавляти своими потребами в тые часы, личбами назначоные, абы ничим продолженье и омешканье не было в отправе личбы. А естли бы писари скарбные, за которыми своими потребами альбо вымыслами в который день личбы не брали, альбо личбу и скарбные пенязи без воли и ведома подскарбия приймовали и послушенства к старшому своему не чинили, а нам бы от того забавенье в скарбных делах належало, ино о том мает подскарбий доносити до нас. Хто в чом коли будет дознан, иж вымышляючи, пожиток с того собе учинил и продолжил личбы, и то нам объявити подскарбий винен, а мы, вину его дознавши, с тым учиним што будет воля наша. Ведже кгды тые писари все то, што бы они видели и розумели шкодного в пожитках наших и потребного к ведомости нашой подскарбию объявят, подскарбий нам объявити винен, и што будет воля наша, то им ознаймит. А они по тому, яко им подскарбий роскажет, мают справовати ся. А кгды подскарбий того занехал и нам не оповедал, тогды тые писари наши мают то нам доносити и оповедати водле присяги своее и повинности к нам пану своему.

Теж опатруючи абы нихто платов наших при собе не задерживал и личбу чинил на часы назначоные, про то так постановляем: с которого бы вряду пенязи до Божего Нароженья в скарб наш были не отданы, о таковом вряднику якого стану будь по Божьем Нароженье подскарбий оповедавши нам, а за волею и за листом нашим мает вослати дворанина в именье его, што бы за оную сумму стояло, и естли тое именье ему заставит в сумме альбо к которому двору прилучит, мает ся в том водле росказанья нашого заховати. И вже таковым вымова не будет пущона на спустошенье, згоренье, вымеретье и убожство на волоках подданых, але всю сумму сполна олиж заплатит, тогды тое свое именье з рук у заставника возмет. А кгды бы маетность его за то не стóяла, а будет без бытности нашое, ино подскарбий его загамовати мает до науки нашое альбо поколе оную сумму всю сполна заплатит, а то для того, иж в недбалость реч нашу господарскую и земского скарбу положил и не отдал того, што-колве выбрати мог.

Ино на ком не мог взяти (яко на уставе описано: иж “неможним, кто бы не мел чим заплатити, абы обтяженье не было”), про то маючи так много часу замереного, мел его в реистр вписати, а што выбрал, то было отдавати перед роком и дбати в речи скарбу нашого. А дале то будет на воли нашой што с так недбалым врядником чинити.

Где бы теж который урядник личбы на нас назначоный не пильновал, хотя пенези в скарб отдавши, ино постерегаючи своевольное недбалости, иж великое затрудненье в скарбе деется, коли рок в рок личбами входит, для того, по выистью менованого часу личбе того повету, в котором оный вряд лежит, мает подскарбий, также за ведомостью и листом нашим, в именье недбалого послати и увезати ся за всю сумму з уряду его до скарбу належачую, и так долго держати тое именье и пожитки з негодо скарбу чинити, олиж личбу вчинити справит ся всего з уряду своего. А то чинити и всылати в таковыи именья не продолживаючи часу, але борзо после року и часу менованого. А кгды увязанье дойдет, оный недбалый не может личбу чинити, олиж в и иные личбы того року доконают ся, тогды вжо его слухати в личбе будут, и, што з личбы при нем найдет ся, заплативши, именье возмет.

Ведже хто бы з якой пригоды, згубы альбо згоренья, або смерти или хоробы служебника, который платы отбирал, альбо сам врядник умрет и жона або дети зостанут, и за иными гвалтовными пригодами не мог пенязей первей дня назначоного в скарб дати, альбо личбу чинити, таковый кождый пред ся мает стати на час, альбо через лист оповедати пригоду подскарбию, также змерлого жона або дети. А подскарбий порозумевши причине именованой, и естли будет слушна, мает ознаймити и зложити ему час ку отдаванью пенязей, альбо к личбе, не даючи увезанью, а того вже часу не омешкати, под обовязком вверху помененым.

Поиск по сайту: